Skólinn

Teikning af Fjólu og samnemendum hennar ásamt tveimur kennurum.

Í Breiðholtsskóla eru um 450 nemendur í 1.–10. bekk og 73 starfsmenn. Skólinn er í hjarta Breiðholtshverfis og við skólann er góð útisundlaug og stórt íþróttahús. Lögð er áhersla á árangur fyrir alla nemendur og einkunnarorðin ábyrgð, traust og tillitssemi eru leiðarljós í daglegu starfi skólans. Skólinn státar af fjölmenningarlegu samfélagi nemenda, foreldra og starfsmanna.

Í Breiðholtsskóla eiga nemendur að njóta sín sem best og fá tækifæri til að láta drauma sína rætast. Innleiðing á Menntastefnu Reykjavíkurborgar til ársins 2030 er í fullum gangi. Á síðustu árum höfum við lagt áherslu á sköpun, félagsfærni, sjálfseflingu og læsi. Framundan er að auka áherslu á heilbrigðan lífsstíl og vellíðan og aukið samstarf við foreldra. Fjölbreyttir kennsluhættir og námsgleði nemenda skiptir miklu í Breiðholtsskóla því ánægðir og glaðir nemendur eiga auðveldara með að nýta sér metnaðarfulla kennslu samhentra kennara.

Frístundaheimilið Bakkasel er fyrir börn í 1.-4. bekk í Breiðholtsskóla og félagsmiðstöðin Bakkinn býður upp á skemmtilegt og fjölbreytt starf fyrir börn og unglinga.

Stjórnendur í Breiðholtsskóla

Skólastarfið

Starfsáætlun

Hvað er framundan í Breiðholtsskóla? Í starfsáætlun finnur þú meðal annars stefnu skólans fyrir síðasta ár, skipulag kennslu og ótalmargt fleira. 

  • Starfsáætlun 2024-2025

Skólaráð

Við grunnskóla skal starfa skólaráð sem er samráðsvettvangur skólastjóra og skólasamfélags um skólahald. Meginhlutverk skólaráðs að vera vettvangur fyrir alla fulltrúa skólasamfélagsins til að eiga samráð um málefni skólans.

Skólareglur

Skólareglur Breiðholtsskóla eru unnar í samræmi við 14. grein laga um grunnskóla nr. 91/2008 en þar segir: 

Nemendur bera ábyrgð á eigin námi og á framkomu sinni og samskiptum með hliðsjón af aldri og þroska. Nemendum ber að hlíta fyrirmælum kennara og starfsfólks grunnskóla í öllu því sem skólann varðar, fara eftir skólareglum og fylgja almennum umgengnisreglum í samskiptum við starfsfólk og skólasystkin. 

Kennarar kynna skólareglur fyrir nemendum og foreldrum/forsjármönnum þeirra á hverju hausti og minna á þær eins oft og þurfa þykir. Skólareglur eru aðgengilegar á heimasíðu skólans.

  • Námið er vinna nemenda og til þess að sú vinna beri árangur ber sérhverjum nemanda að leggja sig fram í námi og taka tillit til annarra.
  • Nemendur eiga að mæta stundvíslega í skólann. Tilkynna skal veikindi daglega á skrifstofu skólans. Að öðrum kosti er litið svo á að um óheimila fjarveru sé að ræða.
  • Nemendur eiga að mæta í skólann með þau gögn sem nota skal hvern dag og það heimanám sem sett var fyrir. 
  • Nemendur eiga að fylgja fyrirmælum skólastjórnenda, kennara og annarra starfsmanna skólans að öllu leyti og sýna kurteisi, ábyrgð og tillitssemi.

 

Nemendur eiga að fara vel með eigur skólans, sínar eigin eigur og annarra. Nemendur bera ábyrgð á því tjóni sem þeir kunna að valda á eigum skólans, starfsmanna eða annarra nemenda.

  • Nemendur bera sjálfir ábyrgð á eigum sínum og fjármunum. Nemendum er bent á að vera ekki með peninga eða önnur verðmæti í skólanum að þarflausu.
  • Nemendur eiga að ganga rólega á göngum og víkja til hægri. Ætlast er til að nemendur tali hljóðlega til að trufla ekki nám annarra.
  • Nemendur eiga að fara úr skóm og geyma þá í skógeymslum.
  • Nemendum ber að fara úr yfirhöfnum í kennslustofum og taka ofan höfuðföt. Yfirhafnir á að hengja upp í fatahengi í stofum, húfur og vettlinga skal geyma inni í ermum yfirhafna.
  • Neysla tóbaks, áfengis og annarra vímuefna er stranglega bönnuð í og við skóla og íþróttahús/sundlaug. Vopn og eldfæri eru bönnuð í skóla og á skólalóð. Sama regla á við hvert sem nemendur fara á vegum skólans.
  • Nemendur eiga að koma með hollt og gott nesti sem eykur vellíðan. Nemendur mega ekki neyta tyggigúmmís, sælgætis eða gosdrykkja á skólatíma nema með leyfi kennara við sérstök tækifæri.
  • Hvers kyns mynda- og hljóðupptökur eru óheimilar í skóla og á skólalóð, einnig í íþróttahúsi og sundlaug nema með sérstöku leyfi skólastjórnenda.
  • Slökkt skal vera á tækjum í kennslustundum s.s. farsímum og tónlistarspilurum og þau ekki sýnileg nema með sérstöku leyfi kennara. Tæki í eigu nemenda eru á þeirra ábyrgð. 

Matur í grunnskólum

Skólamáltíðir eru gjaldfrjálsar veturinn 2024-2025 en mikilvægt er fyrir skólann að hafa áfram yfirsýn, halda utan um upplýsingar um ofnæmi og óþol og takmarka matarsóun. Því þarf eins og áður að skrá nemendur í mataráskrift.

Þeir nemendur sem voru skráðir í fyrra verða sjálfkrafa skráðir í áskrift en aðrir þurfa að skrá sig. Breyting á skráningu fer fram á matur.vala.is.

Breyta skráningu í skólamat Meira um mat í grunnskólum
Teikning af Fjólu að borða mat í skólanum

Foreldrasamstarf

Við erum öll í þessu saman, enda er oft sagt að það þurfi heilt þorp til að ala upp barn. Í skólum borgarinnar er markvisst unnið að því að auka samráð við foreldra og styrkja aðkomu þeirra að skólastarfi. Foreldrafélag  er starfrækt í öllum skólum Reykjavíkurborgar. 

Meira um foreldrastarf í Breiðholtsskóla Meira um foreldrastarf í grunnskólum
Teikning af fólki að spjalla saman.

Nemendafélag Breiðholtsskóla

Við Breiðholtsskóla starfar nemendafélag eða unglingaráð. Nemendafélagið vinnur m.a. að félags,- hagsmuna- og velferðarmálum nemenda. Allir nemendur Breiðholtsskóla teljast félagar í nemendafélagi Breiðholtsskóla. Valdir eru tveir fulltrúar hvers árgangs í 1. – 10. bekk, án tillits til kyns. Nemendur velja sér ekki formann eða stjórn en skipta með sér verkum. Kosning fer fram í ágúst/september ár hvert.

Nemendur í 5. - 7. bekk og 8. – 10. bekk velja/kjósa sér sinn hvorn fulltrúann í skólaráð skólans. 

Forfallatilkynningar

Forföll nemenda svo sem veikindi ber að tilkynna í Mentor eins fljótt og auðið er, láta þarf vita daglega ef nemandinn er veikur lengur en einn dag. Sé óskað eftir leyfi skal það gert með fyrirvara með leyfisbeiðni á heimasíðu skólans. Ef forsjármenn þurfa að fá lengra leyfi en í 2 daga fyrir nemendur þurfa þeir að óska eftir því skriflega, á þar til gerðu eyðublaði og fá samþykki skólastjóra, enda er þá nám nemenda á ábyrgð forsjármanna þann tíma sem þeir eru frá skóla. 

Leyfi sem er lengra en ein vika er litið á sem tímabundna undanþágu frá skólasókn. Sótt er um á sérstöku eyðublaði sem hægt er að nálgast á heimasíðu skólans. Í slíkum tilfellum er forsjármaður boðaður á fund skólastjórnanda og umsjónarkennara þar sem fjallað er um umsóknina. Skólinn fjallar síðan um umsóknina og áskilur sér rétt til að hafna henni ef ástæða þykir til. Öll röskun á námi nemandans sem af slíku hlýst er alfarið á ábyrgð foreldra/forsjármanna.

Mat á skólastarfi

Markmið mats og eftirlits með gæðum starfsins er m.a. að veita upplýsingar um skólastarfið, árangur þess og þróun.

Skoða innra- og ytra mat á skólastarfi Breiðholtsskóla Meira um mat á grunnskólastarfi í Reykjavík

Skólahverfi

Í Reykjavík eru mörg skólahverfi og barnið þitt hefur forgang í sinn hverfisskóla. Engu að síður eiga allir foreldrar kost á að sækja um skóla fyrir börn sín hvar sem er í borginni samkvæmt reglum um skólahverfi, umsókn og innritun. Hér finnur þú upplýsingar um hvaða götur tilheyra skólahverfi Breiðholtsskóla.

Skoða skólahverfi Breiðholtsskóla Reglur um skólahverfi, umsókn og innritun