Nám og kennsla
Grunnskólar Reykjavíkurborgar vinna eftir aðalnámsskrá grunnskóla með Menntastefnu Reykjavíkurborgar til hliðsjónar. Meginmarkmið stefnunnar er að öll börn vaxi, dafni og uni sér saman í lýðræðislegu samfélagi sem einkennist af mannréttindum og virðingu fyrir fjölbreytileika mannlífs.
Í kraftmiklu skóla- og frístundastarfi öðlast börn og unglingar menntun og reynslu til að láta drauma sína rætast og hafa jákvæð áhrif á umhverfi og samfélag.
Mentor
Mentor er upplýsingakerfi fyrir nemendur, foreldra og starfsfólk skólans. Forsjáraðilar og nemendur fá aðgangsorð að Mentor. Á fjölskyldusíðunni sjá forsjáraðilar stundatöflur barna sinna, heimavinnu, námsmat, skólasókn og fleira.
Kennsluáætlanir
Í kennsluáætlunum er lýst inntaki námsins og námsmati sem gefa kennurum, nemendum og foreldrum yfirsýn um það sem fengist er við í kennslunni. Náms- og kennsluáætlanir árganga eru sendar foreldrum að hausti en þær má finna í Mentor hvers árgangs. Eldri nemendur geta einnig nálgast kennsluáætlanir á Google Classroom.
Stefna skólans í heimanámi
Stefna Breiðholtsskóla er að halda heimanámi í lágmarki hjá yngri nemendum en það eykst smátt og smátt eftir því sem nemendur eldast og verða sjálfstæðari í námi. Kennarar setja nemendum fyrir í heimanámi með góðum fyrirvara. Yfirlit yfir verkefni heimanáms eru birtar í Mentor.
Lestraþjálfun er mikilvægur þáttur heimanáms og þurfa allir nemendur að lesa heima á hverjum degi a.m.k. 5 daga vikunnar. Mikilvægt er að þjálfa ýmsar gerðir lestrar, æfa hraða jafnt sem framsögu. Gott er að venja sig á að ræða lesefnið heima og auka þannig orðaforða og skilning hjá nemendum. Foreldrar skrá heimalestur í appið LÆSIR og fá aðgang að því frá íslenskukennara nemenda.
Námsmat
Samkvæmt Aðalnámskrá grunnskóla er megintilgangur námsmats að veita nemendum tækifæri til að geta aflað sér leiðbeinandi upplýsinga um framvindu náms og hvernig nemendum tekst að ná markmiðum námsins.
Markmið námsmats eru:
- Að meta þekkingu, leikni og hæfni nemenda á viðfangsefnum.
- Að meta framfarir nemenda og hvetja til náms.
- Að leiðbeina nemendum um námið og hvernig þeir geta náð settum markmiðum.
- Að veita upplýsingar til nemenda, forráðamanna og kennara um hæfni, framfarir, vinnubrögð og stöðu náms. Einnig að upplýsa viðtökuskóla og skólayfirvöld eftir því sem við á.
- Að greina hverjir þurfa á sérstakri aðstoð að halda.
Viðmið um skólasókn
Mikil áhersla er lögð á stundvísi nemenda í skólanum. Öll börn og ungmenni á aldrinum 6 til 16 ára eru skólaskyld og bera foreldrar/forsjáraðilar ábyrgð á því að börnin innritist í grunnskóla, sæki skólann og stundi þar nám.
Ef misbrestur verður á skólasókn ber foreldrum/forsjáraðilum og skólanum að bregðast við. Til þess að þau viðbrögð verði sem árangursríkust hafa grunnskólarnir í Reykjavík sett sér samræmd viðmið og reglur sem þeir vinna eftir.